A CANCIÓN DO NÁUFRAGO

UNHA PREGUNTA INCÓMODA

No libro de Javier Cercas do que falaba onte, faise unha reflexión que eu quero trasladar aquí pero en xeito de pregunta incómoda.
O texto di así: Me pregunto si, acuciados por las urgencias de la industria editorial o simplemente por el afán de seguir en el candelero, no estaremos dando por buenos productos inmuduros o insuficientes, indignos del prestigio de la letra impresa.
Agora, traslado a reflexión ao noso sistema literario e pregunto o que Cercas, pero transformando un chisco a cuestión: ¿non será xa tempo de editar menos pero de meirande calidade?, ¿non será que o que existe é unha sobreabondancia absolutamente absurda de novidades imposible de asumir?, ¿non habería que ir ordenando dalgunha maneira o asunto para que tivese unha certa lóxica?, ¿coñecedes a alguén que dea lido e, sobre todo, lido ben, todo o que sae publicado ao ano?. De feito, é o que mantén, nunha lúcida entrevista, Sigrid Klaus, editora de Salamandra, na revista Leer deste verán: mellor editar catro títulos ao ano, pero catro títulos bos.

Referencias

Dirección para referencias

Comentarios

1. Para min que teño tanto pendente de ler é desesperante, non me dou posto ao día. Diante disto non me queda outra que a autodefensa, fai tempo que non porfío en rematar ningún libro que non me enganche máis ou menos pola metade, digo eu que se o escritor non tivo forza no comezo menos a terá no final, onde moitos libros semellan ser un ensayo de como escribir sen inspiración pero con oficio. Será que hoxe hai moita xente con oficio e pouca inspiración? Para os que nos gusta ler é unha tortura visitar unha librería e ver centos e milleiros de libros nos andeis e elexir. Doe afundir os euros mailo tempo en tentar descubrir porque tal u ou tal outro ´gañou tal premio ou leva tropecentas semanas na lista dos máis vendidos cando queda tanto indispensable por ler. Por certo, anoto, porque o entusiasmo é contaxioso, "Corredores de sombra".

   Comentario de Rosa Velenosa hace 2 años y 25 meses

2. Imaxino Francisco, que a ninguén se lle escapa, o razoable das túas verbas, pro, nos tempos que corren , ¿a lei da oferta e a demanda, non é a que manda? Se a resposta e afirmativa, os lectores serán os que digan, que escritores vivirán de ese traballo e cales terán que ter outro a maiores pra vivir ¿non?
   Unha aperta.
   

   Comentario de E.F.B. hace 2 años y 25 meses

3. Hoxe en día non é que haxa “overbooking” de títulos, é que o hai de todo. Hai exceso de sabores de iogures, de cremas de “contorno de ojos”, de mortadelas con condimentos, de mollos, de leites enriquecidas con cousas que xa debería ter o leite… en fin. Absolutamente de todo. O problema máis ben é que a literatura non está a conseguir vivir ao marxe das leis do consumo. Supoño que o que fai falta é, como coa televisión, sentido crítico. Non se trata de guindala pola fiestra, senón de decidir que ves e que non. E cos libros igual… hai moito lixo, pero tamén hai moreas de maravillas. So hai que deterse a recoñecelas e non mercar “ese que leu todo o mundo e que din que está tan ben” (palabras máis ou menos textuais escoitadas a unha clienta da Casa do Libro de Vigo).
   
   Por certo: tede coidado de non xuntar sobre a mesa os iogures con bífidos, as cremas de contorno de ollos, o leite enriquecido con calcio o teléfono mobil con videocámara, porque hai un estudo da Nasa que di que a confluencia deses factores podería crear un buraco no espacio tempo que podería absorber todo o planeta e mandalo á periferia de Alfa Centauro. E por alá fai moito frío. O domingo falará disto Iker Jiménez. Non vo-lo perdades.
   

   Comentario de larvós hace 2 años y 25 meses

4. Rosa: eu tampouco sego lendo un libro se non me atrapa desde o comezo. Hai moito que ler e só unha vida para ler. E.F.B., si, por desgraza, tamén o mundo do libro está suxeito á Lei da Oferta e da Demanda. E coido que Larvós, coma sempre, pon o dedo onde hai que poñelo. E, por certo, habería que animarse a pegar ese salto no espazo-tempo que propós.

   Comentario de Francisco Castro hace 2 años y 25 meses

5. Estou de acordo con todos vos. Entras nunha librería, e tes a sensación de enfrontarte aos andeis do super, onde a diversidade, non a calidade é abrumadora. Acertar cun bo libro entre a excesiva oferta, casi milagre. Reler obras mestras, a millor alternativa.
   "Corredores de sombra" grazas por recomendalo, Fran, estou disfrutando da súa lectrura. Felicidades ao autor.

   Comentario de Amara Orzania hace 2 años y 25 meses

6. Entras nunha libería e tes a sensación de emfrontarte aos andeis do super, onde a CANTIDADE, non a calidade é abrumadora...

   Comentario de Amara Orzania hace 2 años y 25 meses

7. 
   Non entendo o mundo editorial. Escoitas historias de escritores que fan marabillas e que teñen problemas para publicar e despois os andeis están a rebentar de libros malos, tanto que despois os venden a quilo. A miña filla é afeccionada aos libros fantásticos (Memorias de Idhun, etc.) e a maioría son triloxías ou máis. Iso é que non interesa a literatura, interesa o negocio e si gastas diñeiro en “marketing” tes que facer máis dun libro para recuperar eses cartos.
   
   

   Comentario de Máis Alá hace 2 años y 25 meses

8. En efecto, Amara Orzania, o problema é de cantidade. Se aínda abondase a calidade... Parabéns, Máis Alá, para a túa filla por ser tan boa lectora. Sobre o que dis, pois é o que andamos a comentar por aquí estes días. A mercadotecnia é a dona absoluta do mundo... Así son las cosas y así se las hemos contado.

   Comentario de Francisco Castro hace 2 años y 25 meses

9. Máis preguntas incómodas:
   Que a oferta anual sexa inasumible por un lector faina excesiva?
   O saudable é ter unha produción literaria anual asumible por un só lector?
   O overbooking, tan ben sinalado por Larvós, non pode chegar a interpretarse mesmo coma un síntoma de normalidade?
   Onde está o mercado, nos lectores de varios supervendas ao mes ou nos que só queren ler LITERATURA con maiúsculas?
   Ímoslles dar o que queren ler ou o que cremos que deben ler?
   Ten alguén a receita de como se garante o desenvolvemento adecuado do corpus literario?
   Un saúdo.
   

   Comentario de X hace 2 años y 25 meses

10. Desde logo, non pretendo unha interpretación tan simple como: non me dá tempo a ler todo o que se edita. É obvio que non é iso. O problema coido que ten que ver coa cantidade enorme de libros absolutamente "circunstanciais" que moitas veces se editan. Eu, por suposto, non teño receitas.

    Comentario de Francisco Castro hace 2 años y 25 meses

11. Entendo, só digo que a diversificación implica necesariamente cantidade e que tamén é parte do labor e da responssabilidade dos editores non publicar calquera cousa. Aínda que non é a súa responsabilidade que logo as cousas vaian por camiños que mesmo a eles non lles gustan.

    Comentario de X hace 2 años y 25 meses

12. Así é. Nada que obxectar.

    Comentario de Francisco Castro hace 2 años y 25 meses

13. Unha parte deste tema moi importante, é o negocio. Co que conxugar calidade e eficacia en ocasións resulta complexo.
    Un saúdo

    Comentario de SZ hace 2 años y 25 meses

14. Ademais, para facer negocio, non hai por que vender calidade.

    Comentario de Francisco Castro hace 2 años y 25 meses

Nombre

Correo Electrónico

URL

Tu comentario

Recordar datos